வெள்ள நீரில் மூழ்கியது நீர்கொழும்பு

தொடர்ச்சியாக பெய்துவரும் கடும் மழை காரணமாக நீர் கொழும்பு நகரின் சில பிரதேசங்கள் வெள்ளத்தில் மூழ்கியுள்ளன. பிரதான வீதி மற்றும்  உள் வீதிகள் பல வெள்ள நீரில் மூழ்கியுள்ளன. வீடுகளிலும் வெள்ள நீர் புகுந்துள்ளது. இதன் காரணமாக மக்கள் பெரும் அசௌகரியங்களை எதிர்நோக்கி வருகின்றனர்.

நீர்கொழும்பு தளுபத்த, கட்டுவ,  பெரியமுல்ல, கட்டுவாப்பிட்டிய உட்பட பல பிரதேசங்கள் வெள்ள நீரில் மூழ்கியுள்ளன.

பெரியமுல்ல பிரதேசத்தில் தெனியாய வத்தையில் 190 குடும்பங்களும் செல்லக்கந்த பிரதேசத்தில் 40 குடும்பங்களும் வெள்ளத்தால் பாதிக்கப்பட்டுள்ளதாக பிரதேசவாசிகள் தெரிவிக்கின்றனர்.

 பெரியமுல்ல ஜயரத்ன வீதியில்  ரப்பர்வத்தை,  கோமஸ்வத்தை ஆகிய பிரதேசங்களில் 300 குடும்பங்கள் வரை பாதிக்கப்பட்டுள்ளன.

நீர்கொழும்பு மீரிகமை பிரதான வீதியில் கட்டுவபிட்டிய பிரதேசம் வெள்ள நீரில் மூழ்கி உள்ளது. இதன் காரணமாக வாகன போக்குவரத்து பாதிக்கப்பட்டுள்ளது. அந்த பிரதேசத்தில் உள்ள பல வீடுகள் பாதிக்கப்பட்டுள்ளன.

 வெள்ளத்தின் காரணமாக பாதிக்கப்பட்டவர்கள் உறவினர்கள் நண்பர்கள் வீடுகளில்  தற்காலிகமாக தங்கியுள்ளதாக  பிரதேச வாசிகள் தெரிவிக்கின்றனர். வீடுகளில் நீர் புகுந்துள்ளதன் காரணமாக வீடுகளில் உள்ள பொருட்கள் சேதமடைந்துள்ளதாக பொது மக்கள் தெரிவிக்கின்றனர்.